|
Í kakadúaættkvíslinni (Cacatua, Calyptorhynchus, Probosciger, Callocephalon, Eolophus og Nymphicus) eru 17 tegundir og fjölmörg afbrigði. Heimkynni þeirra eru í Ástralíu, Suður-Indónesíu og á nokkrum Kyrrahafseyjum. Nokkrar tegundir eru í útrymingarhættu en aðrar eru enn algengar. Þeir spanna frá um 30 cm á lengd upp í 65 cm. Þetta eru fagrir fuglar, galsafengnir og lífsglaðir. Margir eru sérlega kelnir og minna helst á ungabörn að þessu leyti. Þeir láta gjarnan í sig heyra kvölds og morgna og hafa mikinn bitkraft. Margar tegundir eru hafðar sem gæludýr í heimahúsum og veita eigendum sínum ómælda ánægju. Það er heilmikil skuldbinding að eiga þá vegna þess hve langlífir þeir eru, og þeir þurfa mjög mikla umhyggju og athygli. Sumir geta náð allt að 100 ára aldri þannig að þeir geta orðið erfðagripur. Kakadúar eru þekktir fyrir leikaraskap og eru oft notaðir á dýrasýningum. Þeir eru yfirleitt auðveldir í meðförum, stundum matvandir og þurfa góðan, ástríkan aga og aðhald til að þeir verði ekki frekir og uppivöðslusamir.
|
|
