UNDIRSÍÐUR

Páfuglssiklíðurnar (ættin Aulonocara) úr Malavívatni eru með fallegri fiskum sem finnast. Þeir eru ekki af hópi mbúna en eru munnklekjarar eins og flestar aðrar malavísiklíður. Karlarnir skarta stórkostlegum litum meðan kerlurnar eru flestar litlitlar - brúnleitar og þverrákóttar. Æxlunarferlið er stórfenglegt á að horfa. Karlfiskurinn eignar sér yfirráðasvæði, finnur sér sléttan stein eða flöt og lokkar kerluna að með miklum darraðardans. Hann dreifir sæði sínu á steininn og hún lætur eggið í það og tekur það jafnharðan upp í sér til útungunnar. Þegar hrygningunni er lokið rekur karlinn hana burt og hefur ekkert meira með hana að gera. Meðgangan er um 3 vikur og að því loknu sleppur kerlan seiðunum og skiptir sér ekki af þeim meir. Fjölmörg litarafbrigði af Aulonocara eru til og sífellt fleiri að finnast.