|
Í ástralíupáfaættkvíslinni (Prosopeia, Alisterus, Aprosmictus,Polytelis, Purpureicephalus, Barnardius, Platycercus, Psephotus, Cyanoramphus, Eunymphicus, Neophema, Lathamus, Melopsittacus og Nymphicus) eru 42 tegundir og fjölmörg afbrigði. Heimkynni þeirra eru í Ástralíu og nærliggjandi eyjum. Þeir spanna frá 18 cm á lengd upp í 45 cm. Þetta eru fagrir fuglar, skrautmiklir og frekar hljóðir. Margar tegundir eru hafðar sem gæludýr í heimahúsum og veita eigendum sínum ómælda ánægju. Í þeim hópi eru hinir algengu og sívinsælu gárar og svo rósellurnar litfögru. Það er mikil skuldbinding að eiga þessa páfagauka og þeir þurfa heilmikla umhyggju og athygli. Sumir geta orðið 30-40 ára gamlir. Þeir eru frekar þægilegir í meðförum, auðveldir í fóðrun og félagslyndir. Þeir þurfa gott aðhald til að þeir verði ekki frekir og erfiðir. Margar tegundir geta lært að segja einhver orð, einkum gárinn sem er í heimsmetabók Guiness yfir mestum orðaforða sem páfagaukur hefur náð þ.e. um 1.700 orð.
|
|
