UNDIRSÍÐUR

Siklíður af Copadichromis ætt eru litsterkar og fallegar. Þær eru munnklekjarar, eins og flestar malavísiklíður, en flokkast ekki undir mbúnur. Þær verja svæði sitt af töluverðum eldmóði. Karlfiskurinn er litmeiri en kvenfiskurinn. Copadichromis siklíður éta þörunga og smávatnadýr og una sig best í 400 lítra búri eða stærra. Botnlagið ætti að vera þykkt og sandurinn frekar grófur og steinahrúga fyrir felustaði. Tímgunin er hefðbundin fyrir malavísiklíður. Karlinn finnur sér hrygningarstað og grefur niður á flatan stein. Síðan lokkar hann kerluna að með miklum tilþrifum en rekur hana síðan burt að hrygningu lokinni. Meðgangan er um 3 vikur og að því loknu sleppur kerlan seiðunum og skiptir sér lítið af þeim.