UNDIRSÍÐUR

Siklíður af ættinni Labidochromis eru litsterkar og fallegar. Þær eru munnklekjarar, eins og flestar malavísiklíður, og flokkast undir mbúnur. Flestar eru dvergsiklíður á bilinu 7-8 cm, finnast á 1-10 m dýpi víðast hvar í Malavívatni og verja svæði sitt af miklum eldmóð. Bæði kynin eru litmikil. Labidochromis siklíður éta smávatnadýr sem þær plokka úr þörungabreiðum. Tennurnar eru ýmist einodda eða tvíodda framjaxlar og aðeins útstæðar. Tímgunin er hefðbundin fyrir malavísiklíður og auðvelt að fá þau til að hrygna. Hængurinn finnur sér hrygningarstað og grefur niður á flatan stein. Síðan lokkar hann kerluna að með miklu tilþrifum en rekur hana síðan burt að hrygningu lokinni. Meðgangan er um 3 vikur og að því loknu sleppur hrygnan seiðunum og skiptir sér lítið að þeim.